Bi de Wiehnachtsfiire gits en noie Trend!

E grossi Wettiger Firma* het sich entschlosse de Abwanderig vo Kunde zu Firmene ennet de Grenze öppis entgegezsetze. D Idee isch so eifach wi nachvollziehbar:  «Wenn d Kunde scho lieber uf Dütschland gönt go poschte, dann isch das doch au für d Firme-Wiehnachtsfiir en Idee», so de CEO Andreas B. D Aagstellte werde am Fritig in drü Woche, a dem d Fiir söll stattfinde, am Namittag mit eme Car vomene Waldshueter Transportunternehme abgholt und uf Höcheschwand chauffiirt. Dete, im Hotel «Hochschwarzwald»,  wird dann gfeschtet.
En Umfrog unter de Aagstellte het ergeh, dass es ihne nüt usmacht, statt «Es schneielet, es beielet», «Das isch de Stärn vo Bethlehem» oder «Still isch d’Nacht» numme schriftdütschi Lieder dürfe z singe.  D Firma het sogar extra en Chorleite us em Dütsche engagiirt, wo mit de Mitarbeiterinnen und Mitarbeiter s dütschi Advents- und Wiehnachtsliedguet iiüebt und bsunder druf achtet, dass typisch helvetischi Lut, wi de stimmlos uvular Friktiv, nöd gsunge werde.
D Vorteil vo de Wiehnachtsfiire ennet de Grenze liged uf de Hand. «S Biir und de Wy isch vil billiger wi dihei und au s Ässe isch im Dütsche gar nöd so schlächt», so de CFO Josef K.: «Am Samschtig gang ich ja au ennet de Grenze goh poschte, warum set üiseri Firma dem Trend nöd folge?»

Mir vo de WSN säged daderzue: «Fröhlichi Wiehnacht!» Oh, nei, äxgüsi: «Fröhliche Weihnachten!»

*De Name vo dere Firma isch de WSN nöd bekannt und vilicht gits sis au gar nöd. Aber z Bade solls settigi Firmene geh., wo ihri Wiehnachtsfiire ennet de Grenze fiire. Das mit de Lieder isch hingege frei erfunde.
Advertisements